我眼中的香港小姐 麥明詩

麥明詩果屆香港小姐，係我近年唯一一屆有睇嘅（其實係咁啱有睇），當時對麥明詩無乜強烈感覺，雖然有好多人話佢贏在起跑線，有咩咁叻，但我真心覺得佢談吐係歷年港姐中最得體果位，得體呢樣嘢唔係好關「贏在起跑線」事，同是在外國修讀法律系的「齊蔭」也是一個好例子。

今時今日，喺公眾平台夠膽講自己想講嘅嘢，已經唔再係一件容易嘅事，背棄了理想誰人都可以，敢言除咗要面對政治立場不一嘅人外，仲有一大堆玻璃心網民，仲有係喺鍵盤上特別有道德觀念、特別眾人皆醉、特別勇敢嘅戰士。所以當睇見當麥明詩被問有否講粗口時回應「粗口係廣東文化，博大精深點會唔識」、被問對佔中取態時回應「Action speaks for itself. 行動表明一切」，仲有好多佢平時嘅言論、甚至同網民嘅互動，我係打從心底欣賞呢位真正「美貌與智慧並重」嘅香港小姐。

細個果時成日會問人：「邊個係你偶像呀？」果時嘅我唔明偶像其實唔應該得個殼，應該有啲地方係值得你欣賞同學習。而家大個咗，如果有人問我：「你有無偶像呀？」其實除咗Emma Watson之外，如果你話要係香港人，我都唔係好諗到，不過麥明詩會係比較有potential果個，嘻，佢好似細過我。

· · · · · · · · · · · · · · · ·

曾經有位好友講過：「既然呢個世界狗公同豬係佔大多數，何必要強求呢啲大多數去認同你呢？」雖然大把女model露吓波罅就成功呃like，但我相信物以類聚，每個人都會搵到自己嘅知音人，我信㗎，所以我會繼續寫自己鍾意嘅嘢，始終如一丫嘛，況且，波罅我又真係無乜嘅... sor


#欣賞做自己嘅人
#btw新嚟嘅讀者你哋好呀
#其實我個Page乜都講㗎唔好俾我個名呃咗呀
#多謝（港姐tone）

Photo source: 麥明詩 Louisa Mak

_______________________________________

FB: 兼職空姐姥姥
IG: christyylolo
航空資訊、分享生活、隨心寫作。

FB▶https://www.facebook.com/parttimelolo/

UBlog▶http://blog.ulifestyle.com.hk/blogger/christylolo/ 

GoTrip▶http://www.gotrip.hk/author/christyylf/

投考空服員？ | 現職空姐教你 Final Interview 面試技巧

空姐面試 心得！

如果你已經成功通過小組面試，恭喜你！但唔好開心得咁早～ 單獨面試先係最終淘汰賽！可以話一對一面試比起小組面試更加困難，因為係一對一（甚至一對二）情況下，你嘅所有一舉一動、每一個微表情都被考官睇得清清楚楚！想知應該點準備？等我呢個過來人俾啲貼士大家啦 ;)

01）儀容要整潔、平實

成日都見到有女仔打扮得花枝招展咁去面試，其實係多餘嘅，話說我當年面試係無扎髻，只係化咗個淡妝。航空公司唔會太care 你識唔識化妝、扎髻，因為請你之後就會有相關培訓。反而佢地著重嘅係你言行舉止、面部表情等，所以笑容永遠重要過妝容～ 男仔就記得唔好Gel到個頭太浮誇，同埋記得剃鬚。一般而言，只要你俾人感覺乾淨、整齊、莊重就Ok了。

02）準備好你的自我介紹

首先係切勿死背，慢慢講，表現你良好嘅溝通能力。另外你需要有心理準備，考官好鍾意根據你嘅自我介紹去問你延伸問題，例如我當年提到自己有去過水上樂園做暑期工，考官就問我喺呢份工入面令我最深刻嘅係咩。我建議考生可以先講一個簡潔嘅自我介紹，然後喺適當時候作出補充，唔好一輪嘴講晒，咁就唔會比考官覺得你講嘢太過滔滔不絕，另外你可以喺答問題時輕輕地加入自己性格優點（例如係有耐性、有同情心），咁就可以好自然咁表現自己嘅長處啦～

04）表現實際、切勿空談夢想

聽過有唔少面試失敗嘅考生被問到點解你想做空服員時，回答“This is my dream." 嗯… 其實你話比人知做空服員係你嘅夢想問題唔大，但要小心你會唔會比咗interviewer 一個空有夢想、不求實際嘅印象。老實講今時今日空服員工作唔容易，起薪點唔高、要受客人氣、要體力勞動、亦都唔係班班機有得去巴黎、馬爾代夫。個人認為如果考生能夠表現實際，令人覺得你有心理準備去應付空服員日常工作，會比「因為做空服員是夢想」更加impressive 。

05）讓考官知道你對空服員工作的了解

要說服interviewer 你係一個適合嘅人選，你就要話都俾人知你明白份工嘅要求。如果你一味話因為做空服員可以免費環遊世界、可以扮靚靚返工、可以識機師，sorry 門口喺你後面，interviewer會好快請你離開。奉勸各位準備面試嘅朋友，先了解一吓空服員嘅日常工作，包括唔好嘅一面都需要了解，比interviewer知道你有心理準備面對做空服員唔美好嘅一面（例如係清潔廁所、被客人鬧、假日要離開香港等），表現你思想成熟嘅一面，唔係玩玩吓。

06）態度誠懇 Be passionate!

最後係你表現出嘅態度，我成日都話「心態決定境界」，唔係吹水㗎～ 航空公司競爭激烈，最能夠影響航空公司形像嘅就係佢哋嘅前線員工。唔知你哋有無留意國泰航空嘅廣告Slogan，“Service Straightforward from Heart"？意思就係指佢哋員工服務有心而發，姑勿論國泰服務係咪真係咁好，佢哋請人時都一定會想揀啲態度真誠嘅考生去配合公司形像～ 記得要俾人一個態度誠懇嘅感覺喇！

小總結

說到底，一間商業公司請唔請你，佢哋比較重視嘅一定係你可以比倒啲咩公司，而唔係公司可以比倒啲咩你～ 聰明嘅你，一定明我講咩嘅～ 如果你喺去面試之前睇到我篇文，恭喜你呀！因為你已經成功咗一半！

加油啦 ;)

PS 如果想睇返我講嘅小組面試技巧同貼士，可以去我Facebook Page 喔～

________________________________

Facebook | https://www.facebook.com/parttimelolo/ |

UBlog | http://blog.ulifestyle.com.hk/blogger/christylolo/ |

GoTrip | http://www.gotrip.hk/author/christyylf/ |

Youtube | https://www.youtube.com/user/christyylf/videos |

________________________________

領養﹐不棄養 | 關於養小動物 我想說的是… |

當初領養飛雲（我毛小孩的名字）是一個機緣巧合的緣份。兩年前，朋友在寵物店門口遇上一對男女，他們剛剛買了小狗一天，就說因為屋企人唔俾養，所以懇求我朋友接收小狗，朋友不忍心狗BB會有什麼的下場，於是便收留了當時只有三個月大的飛雲，繼而被我們收養了。

飛雲這小子很麻煩，皮膚不好、脾氣不好、體能不好、腦筋又不是很聰明，只是樣子十分呃 like。

當時我知道，總有些親朋戚友心底會疑問我們為什麼要養狗，生小孩不是比較實際嗎？首先，生小孩跟養小動物是完全沒有衝突，第二，兩者完全是兩件沒有關連的事情。而我不知道為什麼老一輩們總是會喜歡把養小動物視為人家不生小孩的前因，或是第時生小孩的障礙。

話說回來，近排有不少朋友說想養狗，我還是希望所有朋友在養小動物前想清楚你飼養的原因。養小動物從來都不會是因為他“好得意”、“很好玩”、“想有寵物陪自己”、“想養某一種品種”等等，而是希望，在這個龐大的動物商業市場上，為無辜的小動物提供一個：家。

看見小動物可愛的模樣，請你也同時準備好他們也會有不討人喜歡的時候，而這將會是一個頗長的commitment. 問問自己：

• 1. 你願意每天幫他清理排泄物嗎？

• 2. 你願意每天在放工之後帶著疲累的身軀去放狗嗎？

• 3. 你願意花時間、心機教好他，即使他可能不太聰明嗎？

• 4. 你願意接受他有可能會生病，需要你付醫療費、和時間去照顧嗎？

• 5. 你願意為了他去對抗有可能出現的閒言閒語嗎？

• 6. 你願意在未來十年，每次去旅行前都要認真安排好小動物的照顧嗎？

• 7. 你願意把他放在你的人生的計劃，包括結婚、生小孩、搬屋甚至移民嗎？

對，這是很現實很認真的。 養小動物不是你想，就去買一隻來試試養養看，養小動物是絕對涉及你人生至少十年的計劃。由我決定領養飛雲開始，就決定好他會一直生活在我的家，無論如何，會陪他一輩子，因為他就是我們的家人。

#此誓
#領養不棄養
#執子之手執屎到老
#為什麼我寫完會想哭的

_________________________________

BTW 感謝讀者支持，我個 Page 開左唔夠三個月已衝破 4000 likes… 要繼續支持我啊 :oops:

FB: 兼職空姐姥姥

https://www.facebook.com/parttimelolo/

有種 好姊妹，就是不用靠 是非 來維繫。

女人圈子裡面，是非，一定存在。我都曾經覺得八婆嘢好好笑，接受他人是非當人情呢種做法。但當人越大，你越會發現女人間的話題如果就只有別人的是非，實在太悶，太無營養，太唔 sustainable了。

我唔係要話自己情操咁高尚呀？我認我係港女，鍾意 shopping, M 到時會發脾氣。但我真心經歷過呢種感覺：每次出嚟食飯，少少 dead air 嘅時候就有人嘗試用別人是非嚟聊起話題，而各人又會認真討論起上來，我唔知呢啲係交戲定乜，我只係覺得好沒趣。

久而久之，我發現我的女性朋友有兩種：

Type 1. 
會講是非，會不停講，傾計內容往往唔關佢自己事，因為都係關別人是非事。所以你唔可能了解得佢好深，可能佢都唔需要你了解佢，於是就成就咗一段好 shallow 嘅 friendship. 見面會開心，但就硬係做唔到 best friend.

Type 2.
傾計時會講好多自己嘢，自己睇法，會交流價值觀。無 dead air，無時間講其他人是非，因為淨係自己嘢都已經講唔完，次次見面都覺得唔夠時間。有難題時會搵佢，然後佢會直接說出跟你心底一致的 solution。同佢講秘密，唔需要加句：唔好話比人知呀！因為佢比你男友更識得保護你，而其實，好多時候佢比你男友更懂得你。

圖是我的 type 2 姊妹，我地咩都講，社會感情家事工作寵物化妝護膚以至睇相紫微斗數，是非就真係無時間講咁多。

大家也請好好珍惜你的 type 2好姊妹，這種關係，我相信會是一輩子的 :)

_____________________________________

FB: 兼職空姐姥姥

https://www.facebook.com/parttimelolo/

_____________________________________

TVB電視節目反思 | 贏在起跑線，真的好嗎？|

贏在起跑線，真的好嗎？

話說我因為一個電視節目學識咗個新 term：贏在射精前。我覺得用“瘋狂”兩個字嚟形容香港某部份家長，一啲都唔誇張。

我唔係話要用我細個個年代同現今情況比較，明白社會趨勢改變咗，但當社會趨勢開始變得畸形時，係唔係仲要盲目跟隨？

生活就只係輸贏？

唔想講太多關於有小朋友星期一二三四五六日都有興趣班上嘅例子，我更加擔心係有唔少家長潛移默化地灌輸小朋友生活就係比賽、一定要贏嘅 concept。如果一個小朋友淨係識同人鬥，太過注重輸贏，絕對唔係一件健康嘅事（無論對小朋友本身以至第時社會）。喺父母悉心安排下，小朋友年紀少少一直贏，成為別人眼中的人生勝利組，未有機會經歷失敗同挫折，咁樣真係好咩？父母唔可以陪佢哋一世，小朋友會長大，父母又如何擔保到佢哋一世人順風順水走向人生終點站？

起跑線 VS 終點線

起跑線係贏咗，但決定孩子自信滿滿地走向終點線的關鍵，係內在心態，而呢樣嘢，唔見得同起跑線有咩直接關係。心態決定境界，起跑線唔會跟你一世。

申利：我唔係一個媽咪，如果我第時有小朋友，一定會狠狠提醒自己今日講過嘅說話，盡可能比我小朋友一個愉快、正常嘅童年。

#扭曲的社會價值觀

圖片源自明報

___________________________________________________

FB: 兼職空姐姥姥

https://www.facebook.com/parttimelolo/

___________________________________________________

空姐有話兒：伸冤呀大人 ｜ 空姐人工 高？｜

似乎好多人對空姐人工有興趣，姑且同大家來個概括，想入行嘅不妨先參考。其實空姐成日俾外行人以為人工高、福利好，福利暫且不提，但係空姐人工，真係唔高的。

先簡單講，我哋係時薪制的，薪酬制度如下：

飛行時薪 + 地面工作時薪 + 外站津貼 = 每月人工。

飛行時薪：

入職時薪大概 $108/hour，每月公司會安排大概 70 飛行小時俾你，更表組合可能係南非(26 hours)+日本即日來回(7 hours)+曼谷過夜(5 hours)+紐約(26 hours)+韓國即日來回(7 hours)。$108 *70= $7560。簡單嚟講，飛得多，人工越多，但有時唔係你想飛多啲就有得飛的，萬一被安排飛爛機（如印度、星加坡即日來回），你將很難與同事調更，因為無人會想要你的爛機（調更解說請參考下文）。

地面工作時薪：

為飛行時薪一半，新入職大概有 $54/hour。所有喺飛機引擎未開時嘅工作時間都會被列入地面工作，例如飛前會議、起飛前地面準備工作、旅客登機、地上delay 等。一般一個月會有 20-30 小時地面工作。攞中位數 $54 *25= $1350。

外站津貼：

每去一個地方逗留，酒店都會俾現金津貼我哋，津貼係當地嘅貨幣，方便我哋唔使下下唱錢。津貼有幾多取決於逗留時間、當地生活水平、酒店級數、匯率等。例如一班 4 日London，大概有 200 英鎊（港幣 2200)，一班曼谷過夜機，大概有 2500 泰匹（港幣 500 幾)。

留意返，公司並沒有保證每月給你長途機，如果被安排即日來回，係唔會有任何津貼的，所以這部分薪金並不固定，亦沒有保證，好彩時我試過有$10000 津貼，黑仔時試過$ 1000 都無。

調更制度：

順帶一提，我公司容許同事與同事間對調更表，當然要符合機管局同民航處規條，例如係7日內要有1日放假。每月有5個 quota，調到你鍾意嘅地方、假期，係你本事，調唔倒就工照返，爛機照飛。

新入職人工有幾多？

好喇，以剛才更表為例，飛行時薪$7560+ 地面工作時薪$1350+ 外站津貼大概 $3800（南非有 $1100 + 紐約有 $2200 + 曼谷有 $500）。假如你喺外國煉仙，一個崩都無使，你月薪將會有 $12800大元。（以初入職薪酬計算）

無呃你，有數得計，所以話，空姐人工好那多？多謝哂呀。可能有啲人會話：車，咁你又唔走？啊唔記得話你知，我做一分工，唔一定因為佢人工高福利好，其實呢個世界好多嘢都同錢無關嘅，對我黎講有時可以喺墨爾本飲杯 flat white放空、 喺弘大行足一日行到腳都跛、 喺曼谷揼個骨、 閒日放假唔駛排隊去唱K… 都已經好值，我會形容呢啲係生活，人工幾高都好，犧牲咗生活就乜都變得無意義。明就明，唔明就唔明，係咁上下啦。

一個做咗五年空姐，月薪長期都唔過二萬蚊的人上。

申利：都係果句，我喺魚翅航空做，其他航空公司可能唔同。

___________________________________________________

FB: 兼職空姐姥姥

___________________________________________________

畢業生工作志願 | 去做 空姐 好嗎？ |

首先俾大家睇下我隻阿婆手，圖中是我的永久傷患:

因軟骨不正常增生而變形的無名指，噤落去會痛，唔戴得戒指。

自從做空姐以來，不停有人問我入嚟做好無，有剛畢業嘅、有想轉工嘅，但講啲嘢俾你哋知，不停不停都有同事同我講走啦好無呀，香港地，再好嘅工都有人彈，再差嘅工都有人做。做唔做，取決於你想喺份工到得到啲咩，呢份工留得住我五年，總有佢留得住我嘅地方。