兼職空姐姥姥: 5月 2016

婚前必經不浪漫階段：買樓寫邊個個名？

此道理特別適用於這裡，香港。

而且特別適用於現今嘅香港，點解？因為我相信上代嘅阿爸阿媽係無幸經歷我地現今呢一代經歷梗嘅事。

又講土地問題？香港地買樓係難，但我身邊成為業主嘅又唔係話無個喎，有能力/辦法買倒樓嘅，恭喜你，但你應該都有啲嘢煩：喂！層樓寫邊個個名？

曾經，有不只一位女性長輩跟我說過，老公話買樓時記住要求寫自己個名，無論你有無份俾錢，這是個保障。原因是如果老公唔要你你仲有層樓嗰啲，er…婚前同我講呢啲，真係好不浪漫。我想了又想，受女性荷爾蒙影響下，有點擔心、失落，因為我地係無傾過呢個問題。

別人同樣事情都有聽過，來來去去都係三篤屁，果三篤屁係咩？就係阿媽話/姑姐話/呀姨話囉，保障呀。喂！平時又唔見你咁聽阿媽話嘅？

其實到最後，所謂嘅保障又是什麼？現今女性，你有職業，有學識，為什麼要apply幾十年前的常規？望下你地啲阿媽，有幾多係有高學歷，有穩定職業？九成都係地鐵都可能唔係好識答嘅家庭主婦，要靠老公養嘅全職家庭主婦。

保障應該是自己俾自己，別人給你的保障，你要感謝，要照單全收，但不要過度依賴，因為我們都是有能力的女人。

我大膽假設，通常會去到買樓階段嘅男女，個男嘅應該都有返咁上下經濟能力，於是都會俾大份，咁個男人就話想寫自己個名咁，於是，有多少因為買樓問題而炒大鑊，甚至臨門結唔成婚嘅case，我見過，真係見過，諗深一層，值得咩？一齊咁多年嘅信任去左邊？

你問我，咁應該寫邊個個名？正常情況下，（姐係你地唔係富二代/堅離地人士/有屋企幫手）邊個俾錢咪寫邊個囉，老公話寫你？照收，總之大方向係寫一個，因為這是在香港置業的玩法（留返一個人個名，等將來你有能力時可以再買第二層樓又好，慳返個雙倍印花稅又好）。

對於80後，90後，要成家立室，有層樓，是很tough 的，買咗樓之後，重要為將來作長線打算（你唔係打算旨意強積金吓嘛），你阿媽唔明白，不要怪她，因為這是她們上一代根深蒂固嘅思想，但如果連你自己都唔明白，咁我就只可說句：祝你好運。

頭盔：我唔係話寫晒兩人個名係錯，每人都有唔同嘅處理方法，二人有共識就Ok，記住，唔好為咗個名，輸咗個信任，輸咗個關係。

最後，女人記得唔好物化自己，你嘅價值，絕對貴過一層樓。

___________________________________________________

FB: 兼職空姐

___________________________________________________

兼職空姐姥姥